Sipas raportimeve të “La Gazzetta dello Sport”, Prokurori Publik i Torinos mund ta marrë në pyetje Cristiano Ronaldon si pjesë e hetimit për kontabilitet të rremë që përfshin Juventusin.

Andrea Agnelli, Pavel Nedved, Fabio Paratici dhe drejtorë të tjerë aktualë janë nën hetim për parregullsi të supozuara në kontabilitetin e klubit.

Disi është i përfshirë edhe ish-ylli i “Bianconerëve”, Cristiano Ronaldo, edhe pse ylli portugez nuk është në mesin e të hetuarve.

Zyra e Prokurorit Publik të Torinos po shqyrton një çështje në lidhje me Ronaldon dhe një marrëveshje ‘sekret’ me “Zonjën e Vjetër”.

Sipas raporteve të shumta në Itali, ka përgjime telefonike ku drejtorët e Juventusit flasin për një ‘dokument të famshëm që teorikisht nuk duhet të kishte ekzistuar’, por hetuesit nuk e kanë gjetur ende dokumentin dhe drejtorët e Juventusit të pyetur nga prokurori thuhet se nuk kanë shpjeguar natyrën e marrëveshjes me Cristiano Ronaldon.

Megjithatë, marrëveshja mund të ketë të bëjë edhe me pagesën e shkëputjes së Ronaldos nga Juventusi kur sulmuesi portugez u kthye në Manchester United gjatë verës.